• Anoniem

Aarbeie en nogmaals aarbeie

Ons probeer om meeste naweke ‘n rigting in te slaan. Daar is soveel mooi en ‘n nuwe wêreld om ons. En ek wil ALLES sien!


My woestynkind hart het nog altyd gesmag na reën en groen! En hier sit ek nou, in Nova Scotia, en dis groen op groen. Die reën is nog nie so baie nie, maar die groen maak op daarvoor. In my are vloei daar ook ‘n redelike goeie dosis plaas tannie. 😊 Ek sal heeldag bak en brou as ek kan.


Laas naweek besluit ek toe ons moet gaan aarbeie pluk. Dis ‘n 90km rit en ek pak al die vorige aand die padkos. Mens weet nooit waar eindig jy op nie (en my kinders is altyd honger).


Die eerste U-pick is toe en ek soek gou ‘n ander een. Die een kind se lip hang al klaar want nou gaan ons nie aarbeie pluk nie. Dankie tog daar is nog een net 3 km verder – Bob Ansems U-Pick in Centreville.

Met die uitklim slag tref die onmiskenbare reuk van aarbeie jou. Dis ongelooflik! Dit ruik soet, dit ruik pienk en dit ruik lekker! Onmiddellik begin dink ek aan elke denkbare aarbei resep. Ek vind dis redelik goedkoop - $ 2.50 per bakkie (as jy nie jou eie bring nie) en $ 2.25 (as jy jou eie bakkie bring). ‘n Vol bakkie weeg so tussen 450 g tot 500 g.

Ons verlaat daardie aarbei velde met 6kg aarbeie. Hoekom? Want daardie aarbeie is ongelooflik lekker! Loshande die lekkerste wat ek nog geëet het. En met elke happie sien ek in my geestesoog iets wat ek kan maak daarmee.


So hier is wat ek opgetower het met al daardie aarbeie.




Aarbei konfyt (in die mikrogolf):

1 kg aarbeie

125-250 ml suiker

125 ml suurlemoen sap


1. Kook aarbeie en suurlemoen sap vir 5 minute op hoog.

2. Roer die suiker by en roer tot die suiker opgelos is.

3. Kook vir 5 minute op hoog en roer deur.

4. Kook nog 5 minute op hoog en roer deur. Ek verkies om dit op hierdie punt te verpulp (baie liggies met ‘n stick blender).

5. Kook nog 10 minute op hoog. Roer elke 5 minute.

6. Gooi uit in skoon botteltjies en bere.


Lewer ongeveer 3 x 500 ml botteltjies.


Nota: dit hang af van hoe soet jou aarbeie is van hoeveel suiker jy gaan gebruik. 125ml het perfek gewerk vir my.



Aarbei rolletjies:

1kg aarbeie

7.5 ml suurlemoen sap

30 ml suiker

30 ml water

Knippie sout


1. Kook alles saam vir 15 – 20 minute.

2. Verpulp tot fyn.

3. Voer bakplate uit met bakpapier.

4. Smeer mengsel redelik dun op die bakpapier.

5. Sit bakplate in die dehydrator vir 3 tot 3 ½ ure op 27 C (71 F).


Variasies:

• 500 g aarbeie, 500 g kersies

• 500 g appels en 500 g bloubessies met ‘n klein knippie kaneel


Nota: Ek het geen idee wat ‘n dehydrator in Afrikaans is nie. Droog boks? As jy nie een het nie, kan dit sekerlik ook in die oond uitgedroog word. Ek het al probeer en dit was minder suksesvol.


Dis natuurlik nie al wat ek gemaak het nie! Ek het ook aarbeie heel uitgedroog. Die kinders eet dit soos lekkers! ‘n Hele sak aarbeie is in die vrieskas vir smoothies. Ek dan gaan ek ook nog ‘n verruklike aarbei koek maak.


39 views0 comments

Recent Posts

See All

©2020 by Ongiini. Proudly created with Wix.com